آج حج کا رکنِ اعظم وقوفِ عرفات ادا کیا جا رہا ہے، لاکھوں حجاج میدانِ عرفات میں موجود

مکّہ (26 مئی 2026): آج سعودی عرب میں حج کا رکنِ اعظم وقوفِ عرفات ادا کیا جا رہا ہے، جس کے لیے لاکھوں حجاج میدانِ عرفات میں موجود ہیں۔

پاکستانی عازمینِ حج کے اوّلین قافلے گزشتہ شب نمازِ عشا کے بعد عرفات روانہ ہوئے، پاکستانی حجاج کے دیگر قافلے ساری رات ناظمین کی رہنمائی میں میدانِ عرفات پہنچتے رہے۔

وزارتِ مذہبی امور کے مطابق آج نمازِ ظہر سے قبل تمام عازمینِ حج میدانِ عرفات میں پہنچ جائیں گے، امسال امیرِ حج مسجدِ نبویؐ کے امام الشیخ علی الحذیفی کو مقرر کیا گیا ہے، مسجد نمرہ میں خطبہ حج دیا جائے گا، عازمینِ حج خطبۂ حج کے بعد خیموں میں ہی ظہر اور عصر کی نمازیں قصر و جمع ادا کریں گے۔

حجاج کرام غروبِ آفتاب تک وقوفِ عرفات کے دوران دعاؤں اور مناجات میں مصروف رہیں گے، اس وقت میدانِ عرفات میں دنیا بھر سے آئے لاکھوں فرزندانِ اسلام کی عبادات اور دعاؤں کا سلسلہ جاری ہے۔

---

یومِ عرفہ پر 33 سال بعد مکہ مکرمہ میں کون سا نایاب فلکیاتی واقعہ رونما ہونے جا رہا ہے؟

---

میدانِ عرفات میں وقوف مکمل کرنے کے بعد حجاج کرام مزدلفہ کی جانب روانہ ہوں گے، یومِ عرفہ پر پاکستان اور امتِ مسلمہ کے امن و سلامتی اور ترقی کے لیے خصوصی دعائیں کی جائیں گی۔

مزدلفہ میں مغرب اور عشا کی نمازیں ایک ساتھ ادا کریں گے، حجاج کرام رات مزدلفہ میں کھلے آسمان تلے گزاریں گے، دس ذوالحجہ کو حجاج کرام جمرات میں شیطان کو کنکریاں ماریں گے، رمی جمرات کے بعد حجاج کرام قربانی اور حلق کریں گے، احرام اتاریں گے، اور طواف زیارت کر کے واپس منیٰ جائیں گے۔

from ARY News Urdu- International- عالمی خبریں https://ift.tt/hFXK80z