امریکا میں جان لیوا اور مضر صحت ٹماٹروں کی فروخت

واشنگٹن : امریکی حکام نے بازاروں میں بڑے پیمانے پر موجود جان لیوا اور مضر صحت ٹماٹروں کی قسم سے عوام کو خبردار کردیا۔

ایف ڈی اے نے ان زہر آلود ٹماٹروں کے لیے سنگین وارننگ جاری کر دی ہے، ٹماٹروں سے متعلق انکشاف ہوا ہے کہ یہ انتہائی آلودہ اور استعمال کرنے والوں کی جان کے خطرے کا باعث ہیں۔

رپورٹ کے مطابق یو ایس فوڈ اینڈ ڈرگ ایڈمنسٹریشن کی جانب سے جاری کردہ انتباہ کے بعد ٹماٹروں میں مہلک بیکٹیریا سالمونیلا کی موجودگی کے خدشات کے باعث اسے مارکیٹوں سے واپس منگوانے کے احکامات جاری کردیے گئے ہیں۔

گزشتہ ماہ ولیمز فارمز ری پیک ایل ایل سی نے رضاکارانہ طور پر بازاروں سے ٹماٹروں کی کئی پیکنگز واپس منگوائیں کیونکہ ان میں سالمونیلا بیکٹیریا کی موجودگی کا خطرہ پایا گیا تھا۔

اب ایف ڈی اے نے اس واپسی کو "کلاس ون ریکال” کا درجہ دیا ہے، جو کہ سب سے خطرناک کیٹیگری ہے جس کا مطلب ہے کہ ایسی پروڈکٹ کے استعمال سے سنگین جانی نقصان یا موت واقع ہونے کا بھی امکان ہے۔

رپورٹ کے مطابق ان ٹماٹروں سے اب تک کوئی بیماری رپورٹ نہیں ہوئی ہے لیکن سالمونیلا بیکٹیریا بچوں، بوڑھوں اور کمزور قوت مدافعت رکھنے والوں کے لیے جان لیوا ہو سکتا ہے۔

سالمونیلا کیا ہے؟

سالمونیلا ایک ایسا بیکٹیریا ہے جو عام طور پر جانوروں کے فضلے سے آلودہ خوراک کے ذریعے جسم میں داخل ہوتا ہے۔ اس کے استعمال سے دست (اسہال) بخار، پیٹ میں مروڑ جیسی علامات ظاہر ہوتی ہیں، یہ علامات عموماً 6 گھنٹوں سے 6 دن کے اندر ظاہر ہوتی ہیں۔

یہ بیکٹیریا معدے سے گزر کر آنتوں میں داخل ہو سکتا ہے اور وہاں سوزش، دست، اور بخار پیدا کرتا ہے۔ بعض اوقات یہ خون کے ذریعے جسم کے دوسرے حصوں تک بھی پہنچ سکتا ہے۔

from ARY News Urdu- International- عالمی خبریں https://ift.tt/YJZL8Ph