یورپی ممالک جانے والے مسافروں کے لیے نئے قوانین کا اطلاق

برلن : یورپی ممالک کے ہوائی اڈوں پر یکم ستمبر سے مائع (لیکوئیڈ) کنٹینرز  لے جانے کے قواعد و ضوابط مزید سخت کیے جا رہے ہیں۔

غیر ملکی خبر رساں ادارے کی رپورٹ کے مطابق یورپی یونین نے یورپی ممالک کے مسافروں کیلئے ساتھ لے جانے والے سامان سے متعلق نئے قوانین لاگو کردیئے۔

اس پالیسی کے تحت مقررہ تاریخ یعنی یکم ستمبر کے بعد یورپی ممالک کے مسافروں کو 100 ملی لیٹر سے زیادہ وزن کے مائع کنٹینرز لے جانے کی اجازت نہیں ہوگی۔

مسافروں کو یہ بھی ہدایت کی گئی ہے کہ وہ مائع کنٹینرز کو ایک شفاف پلاسٹک بیگ میں پیک کریں جس کی زیادہ سے زیادہ گنجائش 1 لیٹر ہو۔

رپورٹ کے مطابق ادویات اور بچوں کے کھانے پینے کی مائع چیزوں کو ان قواعد وضوابط سے مستثنیٰ قرار دیا گیا ہے۔

یاد رہے کہ مسافروں کے سامان میں مائع (لیکوئیڈ) لے جانے کے یہ قواعد پہلی بار سال 2006 میں متعارف کروائے گئے تھے لیکن کچھ جرمن ہوائی اڈوں کیلئے یہ قواعد نرم کیے گئے تھے، جس پر یورپی یونین حکام نے شکوک و شبہات کا اظہار کیا تھا۔

سامان کو کمپیوٹر ٹوموگرافی (سی ٹی) اسکینرز کے ذریعے چیک کیا جاسکتا تھا، یہ ٹیکنالوجی میڈیکل اسکینز کے لیے تیار کی گئی تھی جو بیگ کے مواد کی تیزی سے اور تین جانب سے تصویر کھینچ سکتی ہے۔

نئے یورپی یونین کے قواعد و ضوابط کے مطابق نئے اسکینرز سے لیس چیک پوائنٹس پر مائع کنٹینرز کو بیگ کے اندر ہی رکھا جاسکے گا اور انہیں نکالنے کی ضرورت نہیں رہے گی۔

تاہم، مائع اور الیکٹرانکس اشیاء کو روایتی اسکینرز والے چیک پوائنٹس پر الگ سے نکال کر پیش کرنا ہوگا جو کہ ابھی بھی جرمنی سمیت یورپی یونین کے بہت سے ہوائی اڈوں پر عام ہیں۔

from ARY News Urdu- International- عالمی خبریں https://ift.tt/vyhXEVL