کار سوار مگرمچھ سے ٹکرا کر ہلاک

امریکی ریاست فلوریڈا سے تعلق رکھنے والا شہری ڈرائیونگ کے دوران 11 فٹ لمبے مگرمچھ سے ٹکرا کر ہلاک ہوگیا۔

غیرملکی خبررساں ادارے کی رپورٹ کے مطابق فلوریڈا سے تعلق رکھنے والے 59 سالہ شہری جان ہوپکنز کی گاڑی رات گئے گیارہ فٹ لمبے مگرمچھ سے ٹکرا گئی جس کے نتیجے میں ہوپکنز سمیت مگرمچھ بھی موت کے منہ میں چلا گیا۔

جائے وقوعہ پر موجود افراد نے پولیس کو حادثے کی اطلاع دی۔

پولیس کے مطابق حادثے کا شکار ہونے والے 59 سالہ شخص کی کار الٹ کر ایک کھائی میں جاگری تھی۔

ہوپکنز کے فیس بک پیج سے ان کی شناخت ٹینیسی کے شہری کے طور پر ہوئی، وہ امریکی مردم شماری بیورو کے لیے انفارمیشن ٹیکنالوجی سپروائزر کے طور پر خدمات انجام دے چکے ہیں۔

ڈیلی میل کی رپورٹ کے مطابق انہوں نے سوگواران میں ایک بیٹی کو چھوڑا ہے جبکہ فیس بک اکاؤنٹ میں انہیں سنگل کے طور پر درج کیا گیا تھا۔

فلوریڈا حکام کا کہنا ہے کہ ریاست میں اس وقت تقریباً 1.3 ملین مگرمچھ موجود ہیں جو فلوریڈا کے تمام شہروں کے مختلف جگہوں پر رہتے ہیں اور ان کی وجہ سے اکثر حادثات رونما ہوتے رہتے ہیں۔

from عالمی خبریں – ARYNews.tv | Urdu – Har Lamha Bakhabar https://ift.tt/dl5baVP